العروس( ناصر القحطاني)

خوية درب عمـري ماخـذاني دونـها النسيـان

*********** وانا يا اهل المـلامه ما رغـبت العيش وحـداني

أبي لي مـهرة ما عسفت صـغيره وبنت حصـان

*********** أبوها اللي يـفـك المشـكله ويـزبن الجـاني

وأخـوها لا تعـزوا بأسمـها فـزو له العربـان

*********** يحق لـها الفـخر في قولة آل فـلان جـداني

أبيهـا في بــحر عشـرين لازود ولا نقصـان

*********** ابيها اقصـر طويله والوصوف اشكال والـواني

أبي الجبـهه كما الصبح وكما القوس اسود الحجان

*********** وأبيها ناعسـات ونرجسيّه سـود الاعيــاني

ابي خـد ِ كما ورد تنـمى في وســط بستـان

*********** وأبي خشم صـغير ومثـل حد السيف شامـاني

أبي البسمـه كما البرق وثنايـاها كما المرجـان

************ وشـفاهـا جمـرتين وفمـها خـاتم سليمـاني

أبي شـعـر مثل ذيـل الفرس لا من طبت الميدان

************ أو الشـلال لا مـن بات لـيله بين الامتـاني

أبي جـيد سـواة ابريـق فـضه نـاتق مليـان

************ وصـدر كـأنها مرايـه علـيها طلع رمــاني

أبي ظـهـر كما الجـدول وقد مـثل غصن لبان

************ وخـصر مثـل مجـدول العنـان وجسم روياني

أبيـها نـابـية ردف وبـطن ضـامر جـوعان

************ أبيـهـا مدمجـة سـاق وقدمها لسـان ثعباني

أبيـها بنـت عـزّ من رغـدها ينعم الفستـان

************ أبي الـرقّه وأبي الـدقـه لها بأطـرافها شـاني

أبي المشيـه كمـا اللي طـالع من المعركه كسبان

************ وأبيـها ترش مع خـطـواتها مسـك وريحاني

أبي صـوت الى منـي سمـعته كأن فـيه ألحـان

************ يدغـدغ مسمعي ويثير كل السحر في اشجاني

أبيها حـب وأخلاص وهواجيـس وفرح وأحزان

************ أبيها مثل ما دكـتور أهالي العـشق وصـاني

أبيـها لـوحـة ما صـورتهـا ريشـة الفنـان

************ أبيــها جوهـره ما جابهـا قاصـي ولا داني

أبيـها تنتـصر لي من زمان حطـنـي نيشــان

************ وتبـشـر بالغـلا اللي مالفـى به واحد ثاني

مهـرها قلـب وشـعر يهـز القلـب والوجدان

************ وألبسـها القصـيد وتـصبح أوزاني وقيفاني

أبي اللي فات واللي فات صعب ومن لقى الـعنوان

************ يـرد العـلم والا أفضـل أبقى أعيش وحداني

----------------------------------------------------------
هذه القصيدة للشاعر ناصر القحطاني ..